Jól í skókassa

Jól í skókassa er alþjóðlegt verkefni sem felst í því að fá börn jafnt sem fullorðna til þess að gleðja önnur börn sem lifa við fátæki, sjúkdóma og erfiðleika með því að gefa þeim jólagjafir.  Gjafirnar eru settar í skókassa og til þess að tryggja að öll börnin fái svipaða jólagjöf er mælst til þess að ákveðnir hlutir séu í hverjum skókassa.  Verkefninu var hleypt af stokkunum fyrst fyrir jólin 2004 og söfnuðust um 500 kassar þá, nú 10 árum síðar söfnuðust hartnær 5000 skókassar. Skókassarnir hafa öll árin verið sendir til Úkraínu.

Við stórfjölskyldan höfum tekið þátt í þessu verkefni frá upphafi, en það var móðir mín sem kynnti þetta fyrir mér á sínum tíma.  Mamma og pabbi hafa verið mjög dugleg í gegnum árin að sinna þessu mikilvæga verkefni og hefur mamma öll árin prjónað vettlinga, húfur, trefla og sokka í kassana og oftar en ekki útbúið hátt í 10 kassa ár hvert.  Eftir að við eignuðumst svo börnin fóru þau að taka þátt í þessu með okkur og haft gaman af.  Segja má að þessi tímamót, ár hvert, marki upphafið af jólaundirbúningi fjölskyldunnar.  Frekari upplýsingar um þetta frábæra verkefni má finna hér.

Alexandra með tvo jóla skókassa